Алматы облысының әкімі Марат Сұлтанғазиев аппарат жиынында жер учаскелерін берудің заңдылығы туралы мәселені көтерді. Іле, Еңбекшіқазақ аудандары мен Қонаев қаласында жерлердің нысаналы мақсатын өзгерту деректері орын алғаны анықталған. Облыс әкімі аталған аудандардың жергілікті шенеуніктерін сынға алды, деп жазады agroqogam.kz.
Аппарат жиынында облыстағы үш ауданда жер учаскесінің нысаналы мақсатын өзгерту фактілері орын алғаны белгілі болды. Мәселен, Іле ауданында үш жер учаскесінің нысаналы мақсаты шаруа қожалығын жүргізуден өнеркәсіп нысанына өзгертілген.
Дәл осындай екі дерек Еңбекшіқазақ ауданын мен Қонаев қаласында тіркелген.
«Мен ауыл шаруашылығы жерлерінің сегментациясына және оның нысаналы мақсатын өзгертуге жол бермеу туралы тарсырма бергенмін. Жалпы 27 маусымнан 1 шілдеге дейін облыс бойынша 7,5 мың гектар жерде 578 учаске ұсынылған. Қазір жер беруді қатаң түрде қолданыстағы заңнамалардың талаптарына сәйкес реттеу талабы алдымызда тұр. Жеке тұрғын үй құрылысына берілетін жер учаскелері бекітілген қалақұрылыстық құжаттары бар, дайындалған алаңдардан берілуі керек», — деді Марат Сұлтанғазиев.
Осындай деректердің анықталуына байланысты облыс әкімі берілген жер учаскелерінің заңдылығына талдау жасауға тапсырма берді. Одан бөлек аудан әкімдерінің жер қатынастарына жетекшілік ететін орынбасарларына сөгіс жарияланатынын жеткізді.
Айтолқын Адырбайқызы,
Алматы облысы,
Agroqogam.kz
